Si Kristuffer Darcyth Tan Pring ng Legazpi City, Albay ay nagpatunay na walang imposibleng pangarap matapos malampasan ang kahirapan, pambubulas, at buhay na walang kuryente upang makamit ang limang PRC licenses at magbigay ng inspirasyon sa libu-libong Pilipinong nangangarap ng mas magandang kinabukasan.
LEGAZPI CITY, Albay — Hindi naging hadlang ang matinding kahirapan, pambubulas dahil sa kanyang kondisyon, at kakulangan sa mga pangunahing pangangailangan upang maabot ni Kristuffer Darcyth Tan Pring ang tagumpay. Sa halip, ang bawat pagsubok na kanyang pinagdaanan ang naging pundasyon ng isang kahanga-hangang paglalakbay na nagtulak sa kanya upang makamit ang limang lisensya mula sa Professional Regulation Commission (PRC) at magbigay-inspirasyon sa libu-libong Pilipino.
Sa edad na 30, si Pring ay isa nang lisensyadong Civil Engineer, Geodetic Engineer, Master Plumber, Environmental Planner, at Professional Teacher. Ang kanyang kuwento ay nagsisilbing buhay na patunay na ang kahirapan at kapansanan ay hindi kailanman magiging hadlang sa taong may matibay na pananampalataya, determinasyon, at walang sawang pagsisikap.
Lumaki si Pring sa isang simpleng bahay na kubo sa Legazpi City, Albay na walang suplay ng kuryente. Sa murang edad pa lamang ay natutunan na niyang harapin ang realidad ng buhay—isang realidad na puno ng kakulangan at sakripisyo. Bukod sa kahirapan, kinailangan din niyang tiisin ang pambubulas mula sa ibang tao dahil sa kanyang cleft palate o bingot, isang kondisyon na naging dahilan upang madalas siyang pagtawanan noong siya ay bata pa.
Sa halip na mawalan ng pag-asa, ginawa niyang inspirasyon ang bawat mapait na karanasan upang magsumikap nang higit pa. Ang mga panunuya at hirap na kanyang naranasan ay hindi naging dahilan upang talikuran niya ang kanyang mga pangarap. Bagkus, lalo siyang naging determinado na patunayan na hindi nasusukat ang kakayahan ng isang tao sa kanyang pinagmulan o pisikal na kondisyon.
Malaki ang naging papel ng kanyang pamilya sa kanyang tagumpay. Ikinuwento ni Pring na ang kanyang ina at ang kanyang tiyuhin, na itinuring niyang pangalawang ama, ang nagsumikap upang maitaguyod ang kanilang pamilya. Nabuhay sila sa simpleng kabuhayan ng pagrerepack ng mantika sa maliliit na lalagyan upang maibenta sa mga tindahan sa kanilang komunidad.
Bagama’t maliit lamang ang kanilang kinikita, sapat ito upang maipagpatuloy niya ang kanyang pag-aaral. Ang bawat pisong kinikita ng kanyang pamilya ay naging simbolo ng kanilang pagmamahal at paniniwala na balang araw ay makakamit din nila ang mas magandang buhay.
Ayon kay Pring, pinili niyang kumuha ng kursong Civil Engineering dahil nais niyang iahon ang kanyang pamilya mula sa kahirapan.
“I chose Civil Engineering because I dreamed of lifting my family from poverty and building a better life for them,” ani Pring.
Ngunit hindi naging madali ang kanyang paglalakbay. Ang pag-aaral nang walang kuryente, limitadong kagamitan, at kakulangan sa mga mapagkukunan ng kaalaman ay ilan lamang sa kanyang mga kinaharap. Gayunpaman, hindi niya hinayaang maging hadlang ang mga ito sa kanyang pangarap.
Nang makapasok siya sa Bicol University, inamin niyang dumating ang pagkakataong nagduda siya sa kanyang kakayahan dahil sa mataas na pamantayan ng paaralan. Gayunpaman, nanaig ang kanyang pananalig sa Diyos at disiplina sa sarili.
“I overcame those fears through faith in God, discipline, and the determination to never give up,” pagbabalik-tanaw niya.
Ang parehong prinsipyo ang kanyang pinanghawakan sa bawat pagsusulit sa board examination. Hindi umano siya umasa sa huling minutong pagrerepaso kundi sa tuloy-tuloy na pag-aaral at malalim na pag-unawa sa bawat konsepto.
“I studied consistently using whatever resources I had and focused on understanding concepts deeply,” aniya.
Bukod sa sipag sa pag-aaral, malaking tulong din umano ang panalangin at pagpapanatili ng kalmadong isipan sa tuwing siya ay kumukuha ng board examination. Sa halip na pangunahan ng kaba, isa-isa niyang hinarap ang bawat tanong hanggang sa tuluyang makamit ang kanyang mga lisensya.
Hindi nagtapos ang kanyang paglalakbay matapos maging lisensyadong inhinyero. Patuloy niyang pinalawak ang kanyang kaalaman at propesyonal na kakayahan sa pamamagitan ng pagiging accredited Materials Engineer, Safety Officer, Project Engineer, at pagkuha ng iba’t ibang sertipikasyon sa project management at human resources.
Isa rin sa pinakamahalagang bunga ng kanyang tagumpay ang pagtatatag niya ng 2JP Review Center, isang review center na naglalayong tulungan ang mga nagnanais maging Civil Engineer, lalo na ang mga estudyanteng may kakayahan ngunit kapos sa pananalapi.
Para kay Pring, ang tunay na sukatan ng tagumpay ay hindi lamang ang dami ng titulo o lisensyang natamo kundi ang kakayahang iangat din ang buhay ng ibang tao.
“My goal is to expand our Civil Engineering review center so I can help more aspiring engineers, especially those with limited financial resources,” pahayag niya.
Sa paglipas ng mga taon, hindi lamang limang PRC licenses ang kanyang naipundar. Nagtapos din siyang Cum Laude sa Bicol University noong 2016, kumuha ng ikalawang degree sa Geodetic Engineering, naging finalist sa Ten Outstanding Students of the Philippines (TOSP), limang magkakasunod na taong lumahok bilang quizzer, at naging bahagi ng koponang nagtapos bilang second runner-up sa Philippine Institute of Civil Engineers (PICE) National Civil Engineering Quiz Show.
Ang mga tagumpay na ito ay hindi lamang sumasalamin sa kanyang talino kundi sa hindi matatawarang dedikasyon at determinasyong maabot ang kanyang mga pangarap sa kabila ng lahat ng balakid.
Sa kanyang mensahe para sa mga susunod na board examinees at kabataang nangangarap, hinikayat niya ang mga ito na huwag hayaang diktahan ng kahirapan, kapansanan, o anumang pagsubok ang kanilang kinabukasan.
“Never let poverty, disability, or your situation define your future.”
Dagdag pa niya:
“Disability and poverty are never barriers to success when you have faith, perseverance, and determination.”
Sa panahon kung kailan maraming kabataan ang nawawalan ng pag-asa dahil sa kahirapan at iba pang suliranin, ang kuwento ni Kristuffer Darcyth Tan Pring ay nagsisilbing inspirasyon na ang tunay na tagumpay ay hindi nakabatay sa pinagmulan ng isang tao kundi sa kanyang katatagan, sipag, at pananalig. Mula sa isang bahay na kubo na walang kuryente hanggang sa pagiging may hawak ng limang PRC licenses, ipinakita niyang walang imposibleng pangarap para sa taong hindi sumusuko.
/aptikons